lundi 26 novembre 2012

يا بحر




يا بحر لا تهزمني
خليني نحلم و لشط الأمان وصلني
يا بحر لا تضلمني
لزتني الظروف و المصايب
و ركبت على موجك و تحديتك
طمعت في هدوئك
و قلت إذا عطشت نشرب منك
موش ماك أمر من العلقم إلي سقوني
يا بحر لازم ترضى
باللي رما روح بين أحضانك
و قال الموت أهون من المذلة
نعيش نصارع بين أمواجك
و لا نموت بين أهلي إلي نكروني
يا بحر يا باب الجنة
يخاطر بيك كل  من يتمنى
يوصل أوروبا و يتهنى
ياخذ عزوزة قد أمه
بعد ما خلا غزالة تستنى
يا بحر لا تجافيني
تعلمت و قريت سنين من حياتي

و ترميت كيف أندادي
لا خدمة و لا مستقبل
و لا تشجيع نبدى بيه حياتي
يا بحر ارحم أمي
و بلغها أخبار وصولي
خليها تكفكف دمعها و تدعيلي
و تقول ولدي راجل
تحدى العالم باش يفرحني

 

Aucun commentaire:

Enregistrer un commentaire