بلاش تكنبيص

إِذَا لَوَاحِدْ مَا عَنْدُو كَانْ قَلْبُو

عَلاَشْ يِشْغِلْ في قلُوبْ النَّاسْ

يَمَنِّيهِمْ و يِسَهَرْهُمْ

وِمَا عَنْدُوشْ دوَى لِوِجِيعِةْ الرَّاسْ

يِبْنِي في قصُورْ مِلْ لَوْهَامْ

تُسْقُطْ في لَحْظَة و توَلِّي ترابْ

وِلِّي وِجْهُو إِمَّرْغِدْ في لُوحَلْ

ما يِنَظْفُو كان اِلْجَفَّالْ

و الفَقْر لاهو حَرَامْ و لا عِيبْ

إذا ما تُوعِدْ كان بِلِّي تَقْدِرْ عليه

كان الحُبْ بِلْكَلامْ

تَوَّ نِتْكَلِّمْ مِن غير حساب

لكن آش يَنْفَعْ تَهَبْهِيبْ لِكَلَابْ

إذا بجَرْد عَظَمْ يِوَلِّي السَارِقْ مُولى الدَّار

الناس إلي تحِبْ تِبْعِدْ عَلْقِيلْ وِ لْقَالْ

تَسَكِرْ فُمْهَا و ما تُنْقُلِشْ لَخْبَارْ

تِكْتِمْ السِّرْ و تَرْعَاه

وتِبْعِدْ على تَقْطِيعْ عَراضْ النَّاسْ

كان تَسْعَى لِلْخِيرْ أَرْضَاهْ لِنَفْسِكَ

قَبَلْ ما تِهْدِيهْ لِلْغِيرْ

وِ مَا تُضْرُبْ لغَشِيرْ

قَبَلْ ما تَعْرِفْ أَصْلُو منِينْ

على خاطِرْ كل صغِيرْ عَنْدُو كبِيرْ

ولِّي ما يِحْتَرَمْ لغِيرْ

يِحُطْ عَرْضُو تَحْت سَاقِينْ لُخْرينْ

كان تقُولْ نحِبْ مِنْْ غِيرْ حسابْ

و العِيشَةْ بلا بِيهْ عَذَابْ

ما تَعْمِلْ كان إِلِّي يِتْمَنَّاهْ

وِذَا تخَلِيتْ نهَارْ عَلْ مُرَادْ

رَاكْ توَلِّي كي لَحْمَارْ

لا قِيمَة و لا مَرْكِزْ بين النَّاسْ

ما تُصْلِحْ كان لِرُكُوبْ البَرْدَعَةْ

وِ ضَرْبْ لَعْصَى بلَاشْ حسَابْ

وِلِّي ما يطِيقْ ضَرِبْ لَحْجَارْ

ما يِهِّزْ سِيفْ و يِعَيِّطْ الجِهَادْ الجِهَادْ