أنت كنزي
من صغري وانا متكبر بأمي
عطاء، حنية، كرم و أخلاق
قنوعة، لا تشكي من ضرب الصباط
قدرها عالي
لا تكذب و لا تاكل حق الزوالي
جرات وراء الحلال و شقات ليالي
و عطاتنا حب من غير كيال
فاطمة البية
هدات عمرها الكلوا لينا
من صغرها تخدم علينا
صبرت و تحملت لمصاعب
و لا نهار شكات و قالت يزيني
حرمت روحها باش ترضينا
و تخلينا رغم الفقر
من خيرة نساء و رجال المدينة
ياغالية
ياما دافعتي علينا
و بجسمك الضعيف حميتينا
ياما دللتينا
نحيتي من فمك و وكلتينا
في برد الليالي
تتعري باش تغطينا
و تباتي قاعدة
تطلبي في ربي ينجينا
يا لكريمة
عدينا سنين صعيبة
لكن بضحكتك الدايمة خليتينا
من أسعد لعباد يا لميمة
صدقنا خرافاتك
من بنت السلطان للجازية لهلالية
و عشنا في حكاياتك
أبطال من حمزة للدغباجي
وعشقنا لحياة في نظرتك لينا
يا حاجة
طلبتي ربي و ما خبتي
بناتك و أولادك صاروا نسخة منك
قراو و نجحوا و ما نساوش دمعك
و لا نساو سهرك و تعبك
و طلبوا من ربي يجازيك
يسكنك قصر في الجنة و من النار يحميك
Aucun commentaire:
Enregistrer un commentaire