تِي هَاوْ ڨَالٌو
الحَبِسْ لِلرَّجَالْ
ڨُلِتْ كِيمَا أَنْدَادِي
ڨُونَةْ فِي عَقَابْ اللِّيلْ
جَوْ كَبِيرْ
مُوزِيكَا
أَلْكُولْ بَرِيمَة
و نَفَيِّسْ مَتَعْ سلَاطِينْ
سَافِرِتْ لَعَالِمْ آخِرْ
فِي دَرْجِينْ
سَافِرِتْ لِبَرَّةْ
شَڨِّيتْ لِبْحَرْ عَوَّامْ
مُوشْ مُرُوَّةْ
فِي غَمْضِةْ عِينْ
حَكِيتْ بِالطَّلْيَانْ
و مِلْفَرَنْسِيسْ شِوَيَّةْ
ضَرَبْنِي الحِيطْ
شَدُّونِي الجَادِرْمِيَّةْ
لِلْحَبِسْ هَزُّونِي
مِنْ غِيرْ ثِنِيَّةْ
بَيْتُونِي مِسَلْسِلْ
ڨَالُوا هَذَا مَهْبُولْ
و لاَّ مِخَرْتِلْ
ما يَعْرِفِشْ الشِّيطَانْ وِينْ يُسْكُنْ
اللِّيلَةْ نِظَيْفُوهْ
و غُدْوَةْ نِذَوْڨُوهْ الفِلْفِلْ
بَاشْ يِوَلِّي رَاجِلْ
قَبَلْ مَا يُضْرُبْ مُخُّو
على الصَّبَاحْ هَزُّونِي نِحَلِّلْ
رَجْعُونِي بِالهَلاَّلُو
مُشْتَهْ و صُرْفَاڨْ
و هَاتْ مِنْ هَاكْ اللاَّوِي
ما وُصُلِتْ لِلْبَايَاصْ كَانْ
شِطَرْ سِنُونِي طَاحُو
و نِجُومْ تِتْرَاڨِصْ بِينْ عَيْونِي
عَدِّيتْ أرْبَعَةْ أَيَّامْ
سَاعَة نَطِيحْ و ساعة نُوقِفْ
سَيِّبُونِي
و الله البُولِيسْ طَلَعْ رِجُولِي
و أنا إلي جِبْتُو لِرُوحِي
آشْ لَزْنِي نِتْكَيِّفْ
شَيْ أَقْوَى مِنْ مُخِّي
هَذا حَالْ البُوهَالِي
إلي يِحْسَابْ بَلاَدنَا
ما فيها حَدْ يُظْلِمْ
بلاد الحِقْ و الحُرِيَّة
بلاد سُخُونَةْ
أُولِيَا صَالِحِينْ
و حُقُوقْ مَهْضُومَةْ
و نَاسْ تِتْكَلِّمْ عَلَى الدِّينْ
بِلِحْيَةْ طُوِيلَةْ
جِلْبَابْ و سَبَادْرِي نَايِكْ
رِيحْتُو تُضْرُبْ المَنْعُولَةْ
و يَا وِيحْ إِلِّي يَقُولْ عِيبْ
و لاَّ يِتْجَلْتِمْ
يَعَلْقُوهْ كِيمَا الفَرُّوجْ
و يِحَلِّلُو دَمُّو
رُدْ بَالِكْ تِقُولْ جَرِيمَةْ
تَوَلِّي في لَحْظَةْ كَافِرء
و يُرْجَمُوكْ كِي الشِّيطَانْ
هَذَا عَرْضِي
شَابْ تُونِسِي
فِي كِلْمَتِينْ
مِنْ حَرْ يِوَلِّي مُجْرُمْ
يِكْفِي نَفَيِّسْ سِبْسِي
و لاَّ دَبُّوزِتِينْ بِيرَةْ
لا عَادْ عَنْدُو دِينْ و لاَ مِلَّةْ
يِمْشِي بِينْ السَّاقِينْ
و لاَ حَدْ يِنَادِي بِاسْمُو
Aucun commentaire:
Enregistrer un commentaire