الهجة

هَجِّيتْ لبَلاَدْ الغُرْبَةْ

حُبًّا فِي بِلاَدِي

و إلا هُرُوبْ مِنْ الغَدْرَةْ

عِشْت عُمْرِي نِتْمَنَّى فِي خِدْمَةْ

شَوَيَّةْ كَرَامَةْ

و بَعْض من الحُرِيَّةْ

قَامِتْ القِيَامَةْ

و ثَارْ الشَّبَابْ و قِلِبْ الدُّنْيَا

صَبَحْ الحَاكِمْ هَارِبْ

و إِلِّي كان مِخَزِّزْ فِي الحَبِسْ

صَبَحْ يِتْقَسْدِرْ

الله يُنْصُرْ مِنْ صَبَحْ

فَرَحْنَا و قُلْنَا هَانَا وُصُلْنَا

حَقَّقْنَا المُرَادْ و طَيَّحْنَا الظَّالِمْ

انْتَخَبْنَا نَاسْ تَخَافْ رَبِّي

حُقُوقِيِّينْ و حَاسِّينْ نَارْ الحُقْرَةْ

بَعْد شَهْرِينْ ظَرْبُونَا بِالكَرْتُوشْ

و وَلِّينَا كِيفْ الفَرَارِجْ يَرْمُونَا بِالرَّشْ

كُلْ مِنْ يِقُولْ قَوْ

و إِلاَّ يِصَوِّرْ تَصْوِيرَةْ

يِتْمَرْمِدْ كَيِنُّوا فَارْ حَبِسْ

أَمَّا إِلِّي يِمَثِّلْ

و يَعْمِلْ فِيهَا بَطَلْ

يِتِمْحَى اِسْمُوا

و يِقُولُوا عَلِيهْ اِرْهَابِي

شُيُوعِي، كَافِرْ و مُشْرِكْ

يِلْزِمْ بِالطُّوبْ يِتِرْدِمْ

هَجِّيتْ بِلاَدِي

وَرِكِبْنَا فِي فُلُوكَةْ

كُلاَّهَا صَدِيدْ

مُوتُورَهَا تِقُولْ تَرَكْتُورْ

و إِلاَّ طَاحُونَةْ مَتَاعْ نَاسْ قِبَلْ

شَقِّتْ بِينَا البَحَرْ

إِلِّي يِدْعِي فِي رَبِّي و إلي يِسِبْ

و إلا سِكِرْ مِنْ غِيرْ سِبَبْ

سِكِتْ المُوتُورْ

دَخِّنْ و قَلْبُوا تِحْرَقْ

بِدَا الصِّيَاحْ و العِيَاطْ

الطَّايِحْ أكْثِرْ من الوَاقِفْ

الشِّيفُورْ قَالْ مَايِنَةْ

عَلِيكُمْ بِمَاءْ البِحَرْ

هَذَا حَالْ شَبَابَنَا

لا خِيرْ لاَ فِينَا لا فِي بِلاَدِنَا