بالله يا ماشي للنار برجليك
أرجع و توب و تبع رضا والديك
تبع رضا لميمية
إلي كبدتها تحرقت من يوم غبت علينا
ليل و نهار و هي تسأل فينا
إمتا يروح الغالي و يطل علينا
إمتا يرجع لحضني و لصدري انضموا
إمتا يكفكف دمعي و يترما في حجري
يا ربي جيبوا قبل ما نعمى و نفقد نظري
بالله يا ماشي للنار برجليك
أرجع و توب و تبع رضا والديك
ربي إلي خالقنا
قال ما نرضى إلا لما ترضيهم
فلا تطلب شهادة و لا جنة
و أنت سبب سخطهم و غضبهم
أنت سبب الحرقة إلي تقطعهم
طمعت في السكينة
في ملاقات الخالق إلي يراقب فينا
و خليت العيلة الكل حزينة
تطلب في ربي وقتاش يردك سالم لينا
ينجيك من المصايب
و لا يموت على يدك مظلوم و لا ظالم
و لا يجعل سبب في تهديم دار و لا محارم
بالله يا ماشي للنار برجليك
أرجع و توب و تبع رضا والديك
بوك بعد لا سمع بترحيلك
طاح على الأرض و صاح يا ويلي
راهم نحروني
شواوني في كبدي و نوارة عيني
لا عاد لقمة تسكن فمي
و لا شربة ماء تروي عطشي
خلاوني رهينة في تركينة
لا ولد يبني قبري و لا حد يمشي في دفينة
هزيت يديا لربي
و قلت الله يهلك من كان سبب في عجزي
و تحطيم إلي بنيتوا بدمي
سنين و انا انقري و نوري
باش ولدي يولي راجل و يعاوني
يجي ولد حرام ياخذوا مني
و يرميه في النار و يحرقني
يا رب ردوا ليا و تاخذ عمري
باش يراعي أموا و يستر عرضي
Aucun commentaire:
Enregistrer un commentaire