mardi 3 avril 2012

قدماء التجمع و تعامل المجتمع معهم




           بعد 14 جانفي و تزايد كره و إحتقار المجتمع التونسي بجل طوائفه و إنتماآته لأزلام النظام المقصي، أبناء و بنات الحزب الذي قهر البلاد و إمتص دماءها لمدة 23 سنة، و بعد ما ضن الجميع أنه سيقع تتبع لهذه الفئة أو على الأقل لقياديها و ناشطيها المخلصين لبن علي و التجمع، وما القضايا المزمع رفعها ضدهم و تجريمهم الذي لا غبار عليه في البداية، و التصريحات السياسية التي نادت بإقصائهم و محاسبتهم و تسليط أشد العقوبات على من إستغل بصفة مباشرة أو غير مباشرة إنتماءه لهذا الحزب.
         مرة الأيام و الأشهر، و جاءت الحكومة الأولى و الثانية،و صدر حكم مستعجل بحل التجمع، و إسترداد أملاكه و كل أملاك الدولة التي كان يتصرف بها، بموجب أو بغير موجب، و إلزام كل الناشطين و العاملين بدار التجمع، و الذين هم في الغالب ينتمون لشركات وطنية و يتقاضون أجورهم منها، أن يلتحقوا بمؤسساتهم و يتم التعامل معهم كباقي العمال، و الذين لا يرغبون في العودة إلى مؤسساتهم يمكن لهم الحصول على التقاعد المبكر.
          تمضي الأيام،الكل يتوعد و يتساءل و يرمي باللوم على من سبقه، و جاءت الإنتخابات و إنشغل الكل في إنشاء أحزاب و تيارات جديدة و بدء إندثار التجمعيين و خاصة منهم أصحاب الخبرة و الدراية و الذين تم ضمهم بوعي أو بغير وعي من جل أحزاب الغفلة، الذين و جدوا فيهم المنقذ و الورقة الرابحة التي يمكن أن تجلب لهم عديد الأصوات.
                بعد مرور سنة و نصف على الإنتفاضة و هروب بن علي، و بعد حكومة الغنوشي التي لم يطل حكمها و التي إتهمت بالتستر على أزلام النظام السابق، جاءت حكومة السبسي و بادرت بمحاسبة التجمعيين و صدر أمر بمنعهم من المشاركة في الإنتخابات أو بإنشاء أحزاب، ثم تراجع السبسي، بضغط من حكومات أجنبية مثل أمريكا و فرنسا و التان لم تدخرا جهدا في الدفاع عن بعض الوجوه التجمعية القديمة، و أعدت الحكومة قائمة بأسماء لم تنشرها، لكن صرحت أن القائمة تحمي التونسيين من التجمعيين الذين تمت إدانتهم و لا فائدة من التشفي منهم.
          اليوم و بعد 100 يوم و نيف من حكومة الترويكا المنتخبة شرعيا وما لا يقل على 5أشهر من تكوين المجلس التأسيسي الضامن في الأصل لحماية حقوق التونسيين و الذي تعهد بإسترجاع الأموال المنهوبة و رفع الضرر المادي و المعنوي عن التونسيين، لم نتوصل بعد إلى إصدار أي قانون يدين أي المنتمين، بل بالعكس، لاحظ التونسيون أن أغلب هؤلاء التجمعيين يتمتعون بكل حقوقهم و يتصرفون في أملاكهم  التي حصلوا عليها في فترات سيطرتهم على البلاد و أموالها و الذين هم مطالبون في الواقع بإرجاعها لأصحابها أو لخزينة الدولة إذا لم نقدر على معرفة أصحابها الأصليين.
          أما التجمعيين الذين رجعوا للعمل بمؤسساتهم أو الشركات الوطنية التي ينتموا إليها أصلا، وهو الموضوع الذي دفعني لكتابة هذه الورقة، هؤلاء لا زالوا يعاملون بإمتياز على بقية العمال، و لا أحد، و لا أي مسؤول يملك الشجاعة او القدرة على معاقبة هؤلاء، يمكن أن يكون فمة أوامر لا علم لنا بها، و التي توصي رؤساء المؤسسات بعدم التعرض لهؤلاء؟ مراعاة لإنتماآتهم القديمة و التي يعتبرونها خدمة للوطن؟ ربما يخافون ردود فعلهم إذا ما طالبوهم بالقيام بواجباتهم كبقية الموظفين؟؟؟
           أسئلة كثيرة تطرح و لا إجابة، من يملك الحقيقة؟ مااذي يريد إخفاءه أهل السياسة؟ لماذا يخافون منهم؟
           أحد هؤلاء التجمعيين ( موظف سامي )، ينتمي للشركة الوطنية للسكك الحديدية التونسية و الذي تم ضمه لمؤسسة التجمع لمدة 20سنة، يتقاضى أجرته و كل الإمتيازات القانونية و الغير قانونية من الشركة الأم كل هذه المدة المنقضية، تم إلحاقه أو بالأحرى رجوعه للعمل بشركته بعد حل التجمع، و منذ ذلك الحين أسند له مكتب و كمبيوتر و أوراق، لكن لا يحضر إلا نادرا (مرة أو مرتين في الشهر و غالبا تكون زيارته للمكتب لا تفوت ½ ساعة) و رغم هذا التغيب المستمر، و الإستهتار بنضام الإدارة و قوانينها التي تلزم كل الموظفين، فهذا السيد لا يجد من يحاسبه أو يعيده للجادة أو يعاقبه كما تنص القوانين الإدارية المعمول بها.
           لماذا يعامل هذا الشخص بالذات بهذه الطريقة؟ لماذا لا يسأل عن غيابه؟ لماذا تدفع له من المال العمومي أجرة لا يستحقها؟ هل أصبح إنتماؤه للحزب الذي نهب البلاد لمدة 23 سنة ميزة تجعله فوق المحاسبة؟
الأسئلة عديدة و المجال لا يتسع لطرحها، لكن أترك لكل مواطن أن يطرح الأسئلة التي يراها، ربما يجد لها مبررا، اما أنا فلا أقدر على فهم ما يحصل فالسياسيون الذين طلبوا أصواتنا بالأمس  ليحققوا لنا العدل و الحرية و المحاسبة، هل تناسوا وعودهم أو أجبروا على تناسيها و تركوا الذئب يرعى بجانب الخروف.

lundi 26 mars 2012

التونسي يكره الحرية، ماتقليش كيفاش؟




        التونسي للتونسي رحمة، هذا إلي تعلمناه وحنا صغار من عند والدينا و إلا من عند مربينا و معلمينا و حتى أساتذتنا. و باش الواحد يحس بخوه التونسي و يفكر فيه و يحاول يجتنب كل ما ممكن يسيئلوا و يعرضو للخطر يلزم يشوف كل حاجة ممكن تقلقو هو و إلا تعكر حياتو و تعرضها للخطر، هكا كيف يفهم إلي يوجعو هو راهو يوجع جارو و كل واحد يعيش معاه في بلادو، يولي قادر باش يتجنب الأذية.
الأذية اليوم يا توانسة هي عدم الإكتراث بالطبيعة و عدم حمايتها و المحافظة عليها ولي هي الضمان الوحيد لحياة أولادنا و صحتهم خاصة، و إذا أحنا اليوم نقضيو عليها و ما نخليوهاش تتنفس، تموت هالكطبيعة و أولادنا يموتو بلاش بيها.
و البعض من التوانسة إلي غير مسؤولين ولي موش حاسسين بالخطر ولي يضنو انهم كيف يلوثو البلاد قاعدين يلوثو فالبلدية و ينتقمو منها يلزم يفهمو إلي هوما يلوثو فلحقيقة كان في رواحهم، في بلادهم، فالطبيعة متاع أولادهم، وكل واحد يستهزئ اليوم بها البلاد و يوسخها راهو غدوة هو إلي باش يشم الريحة الناتنا.
Ajouter une légende
نتكلم اليوم على الوضع الخايب إلي شوفتو في مدخل تونس "الخضراء" وانا جاي للخدمة نشوف في كداس متاع فضلات و بقايا الياجور و الحطام ملوح فوق الحشيش و الزهور إلي كنت إنشوفها في مدخل تونس الجميلة و إلي كل واحد يبتهج و هو داخل لتونس، لكن أصحاب الشر و إلي ما يخممو كان في نفسهم و في اليوم هذا باش يتخلصو من فضلاتهم بقل تكليف و بالإسائة للهالبلاد إلي محتضنتهم و منورة عيشتهم. و بالطبيعة في غياب المراقبة متاع البلدية، إينعم في غياب المراقبة، على خاطر التونسي عمرو ما قدر يتقدم في مخو، لتوة مازال يلزمو مراقبة مستمرة باش يعيش و يتعايش معا الناس، إلى يومنا هذا التونسي مازال يرفض الحرية، بطبيعة مادامو يلزمو حد يعس عليه باش يعيش في المجتمع. حد يعس عليه باش يستحفض على بلادو، باش أولادو غدوة تلقا وين تعيش يلزمو شكون يقود بيه باش يعرف مرة أخرى معنا الحرية إلي تحرم منها سنين و إلي وقت إلي تهداتلو رفضها و طلب شكون يعس عليه.

mercredi 14 mars 2012

الحس بالمواطنة: زعمة مزال فما أمل؟



البارح كيف خرجت من الخدمة خذيت الكار من تونس للزهراء (TUS)  أو ما تسمى بالنقل الحضري، زعمة الكار الباهية و إلي كل حد عندو بلاصتو، لا تدزني لا إندزك، بعد ما تعبة الكار و نادات إلي تقص التساكر للشوفور( إلي كيما العادة خلا الكار و مشا يعمل في قهوة) إنطلقت الكار من محطة برشلونة، و لا يوريك و لا يروعك ما خرجنا من المحطة لشارع قرطاج إلي بسيدي و سيدي: عيشك قدم شوية، عيشك وخر شوية، وإلي واقف في وسط الكياس، و التاكسيات إلي مسكرة الطريق و تحب تتعدا قبل الناس الكل و سيارة الأجرة متاع سوسة و صفاقس إلي نرمالمون يعبيو من محطة المنصف باي و إلي جاو إلبرشلون باش يخطفوا الركاب متاع القطارات و التاكسي الجماعي إلي هوما زادة خذاو بلاصة في محطة برشلونة و يبداو يدورو، يمشيو و يجيو قدام الكيران باش إيفكو الركاب من الوسايل لخرى، إلحاصيلو سوق و دلال..
بعد حوالي 5دقايق تمكن شوفورنا لعزيز من الخروج لشارع قرطاج و إنطلق، يا سيدي و ما نحكيلكمش هاك الشفور كان في سينة صبح في سينة أخرى، رغم إلي حاطط إذاعة الزيتونة بصوة قوي و إلي كانت تذيع في آياة قرآنية و أحاديث دينية، السيد ولانا شوماخر، هاك الكار ولاة سيارة سباق، و بدا إيزقزق بين الكراهب و لا يوقفوا لا فو روج و لا ستوب و لا أولوية، حتى المحطات إلي فيهم مسافرين كانو يشيرو باش ياقف ما يتلفتلهمش جملة، الراجل تقول ركبوه الجنون، أما الأدهى و الأمر، إلي حتى واحد وإلا وحدة بما فيهم أنا من الراكبين و إلي متأكد كانو مرعوبين من طريقة السياقة متاعو لا تجرأ و طلب من الشوفور باش يرجع شوفور طبيعي و يسوق بصفة طبيعية و رصينة ليس للمحافظة على روحو و إلا على الحافلة إلي ياكل منها فالخبز بل علينا أحنا إلي دفعنا فلوسنا باش إنروحوا لديرنا سالمين.
 هذا علاش إليوم حبيت نتكلم على الحس بالمواطنة و على ثقافة النعامة إلي كل ما تحس بالخطر تحط راسها في التراب و إلا ثقافة التسرديك متاعنا إلي الحس أكثر من الفعل، تسمعو يعيط تقول باش يفتح إفريقية و هو في الواقع إيبهبر أكهو، يا توانسة يلزمنا نتكلموا على حقوقنا من غير سب و لا تجريح "بالتي هي أحسن" كيف ما يقول سيدنا عليه الصلاة و السلام، إلي يشوف واحد غالط إيفيقو و ينصحو و يوقفوا عند حدو إذا الغلط متاعو إيمس مصالحنا ولا حريتنا.
و اليوم خصصت بالحديث الشوفرة و وسائل النقل العمومية، إلي من وقت إلي هرب المخلوع وقع فيها تسيب كبير و ماعاد حد يحترم القواعد الأساسية للسلامة، و ولينا إنشوفو في سيارات متاع نقل سلعة تعبي فالعباد إلي يقبلو باش يقعدو على كراسي لوح ولا مدرية و يزيد إخلصو المعلوم متاع التنقل كيما الوسايل لخرة، و يا لندرا عارفين إلي ماهمش مسوقرين و إذا الله لا يقدر يصير أي مكروه إلى هاك السيارة مشاة فيهم و في الحشاشة و حتى حد ما يستعرف بيهم، وما يكفيش هالكلندستان (les clandestins)  باش يركبو الناس في وسيلة غير سامحة لنقل المسافرين، الوسيلة إلي عادة مهيأة لنقل 2 ركاب يركبوا فيها 10 إذا موش أكثر، و في هالحالة إنلوموا علي يركّب و إلا إلي يقبلو باش يركبو بفلوسهم في ظروف كيما هكة؟
 الشيفور متاع التاكسي و إلا الكار الصفرة و إلا الزرقاء و حتى متاع النقل الريفي و سيارات الأجرة، على كل مواطن يستعمل هالوسايل هذي و يلاحظ أي تصرف ممكن يعرض الركاب و إلا الوسيلة و إلا أطراف أخرى للخطر: من إفراط في السرعة، عدم الإنتباه للأضواء و علامات المرورباش ينبه بتربية من غير غش و من غير مساس بالأخلاقيات و لا عياط، بصفة متمدنة السيد السائق و إلا الشيفور و يطلب منوا باش يحافظ على روحو و على الناس إلي مكلف بإيصالهم في سلام و يحترم قواعد المرور، و صدقوني إلي راهو إذا تكلم أي واحد بأدب و ما إستجابش السيد هذا، الناس الكل إلي فالوسيلة هذي يساندوه و يفرضو على الشيفور الإنسياق لرغبة و سلامة المسافرين و هكة كيف يلقى روحو قدام أغلبية يولي يرضخ و يحترم. أما بالنسبة لسياراة التاكسي فرجاء من كل مواطن يلاحظ عدم إحترام السائق لقواعد المرور أنو يوقفو عند حدو أولا بطلب متحضر بتربية و إذا ماستجابش، تطلب منوا باش ياقف و تنزل و تاخذ الرقم المنجمي متاعو و تبلغ عليه و هكا تكون قدمت خدمة ليه هو و لكل المواطنين.
 إلحصيلو، نتمنى أني نفيدكم بها الكلام هذا و نتمنى باش التصرف متاع كل مواطن تونسي يولي متحضر و مسؤول و نوليو عندنا تقاليد باهية كيما البلدان المتقدمة و نولين نحترمو بعضنا و ما نتعداوش على حقوق غيرنا.

mardi 13 mars 2012

يوم الأنترنات و مزية العالم الإفتراضي

           ليوم حبيت نكتب حاجة، حبيت نخرج من الصمت و نقول أي حاجة إلي بيه الفايدة أني نكتب حاجة موش كيف العادة، فالعادة تجنبت باش نكتب فالسياسة موش إختيار فالواقع، اما خوف كان ينتابني ملي عمري 15سنة أول مرة كتبت شعر، ساعتها كنت مغروم بجيل جيلالة و ناس الغيوان إلي جابولنا لوغة جديدة فالتعامل مع القضية العربية و غناياتهم كانت تشعل فينا الوطنية و الكرامة، وقتها في أواخر السبعينات كوّنت أنا و بعض الأصدقاء و الناشطين بدار الشباب فرقة موسيقية عندها طابع فرقة ناس الغيوان و بعد ما غنينا أغاني ناجحة متاعهم خممنا باش نعملو غناية متاعنا، و كتبت وقتها أول غناية من تأليفي "نحنو العرب" و بعد عديد من التحضيرات أقترح علينا من طرف رئيس دار الشباب أن نقدم عملنا في إحتفال عيد الشباب و الذي يحضره رموز الحزب الإشتراكي الدستوري و هو طبعا الحزب الحاكم وقتها.
         يوم الإحتفال كان يغمرنا سعادة لا توصف و إعتزاز بالعمل إلي حضرناه و غنايتنا كانت تبدولنا أحلى غناية خير حتى من غناياة ناس الغيوان.
        و بعد ما كملنا العرض متاعنا و بعد ما كنا ننتظر شكر المسؤلين على العمل متاعنا ما راعنا كان رئيس دار الشباب يكفر و يتهز و يتحط على االكلام إلي غنيناه و إلي ماكانش عندو علم بيه و تعرض لتوبيخ من طرف الحزبيين الحاضرين.
بعض كلام الغناية :
نحنو العرب ناس كبار و فالدول عندنا قيمة
نحن العرب ناس كبار و علاش خليتوا بينا
حطيناكم عالكراسي باش تقيمو علينا
سد من السدود الكبار في الشدة يحمينا
ياخي خيبتوا ضنونا و تركتوا للكلاب ديرنا
و جعلتوا منا
 ديار الغربة ديارنا و بلدان أوروبا مآلنا
           و من هاك النهار، تخليت على الكتابة بالعربية و في كل ما يمس البلاد و السياسة و وليت نكتب كان فالحب، بالطبيعة كيف ما نشوفوا أنا.
           و مشات أيام و جات أيام و صار التحول، إلي عمل زوبعة في تاريخ تونس و إلي تعدت البلاد من مرحلة بورقيبة إلى مرحلة الزين من غير ماصار حتى مشكل، و الناس الكل فرحة بالوضع الجديد، و إلي الكل كانوا متأكدين أنوا مش ممكن يولي أسوأ ملي كان عليه في الأيام الأخيرة من نضام بورقيبة. و الخطاب الجديد متاع هاك اليوم المزبل عطا نكهة جديدة و أمل جديد فالتغيير النموذجي للسلطة و الوعود الخادعة إلي قطعها على نفسو "زابا" ما كانت في الواقع كان رش رماد على العينين. و ما فاتت سنتين على التحول حتى تأكد لكل الناس إلي ستبشروا في وقت ما، أنو ما تغير شيء، و الإنتخابات أكدت هذا.
           وولات من وقتها أغلبية السجون متاع البلاد وسيلة إسكات و حتى قتل كل من يخرج على الصف، و البنادرية فالبلاد كثرة و بداو الكل يفتيو فالخطاب متع 7نوفنبر و ردوه كاينوا قرآن نزل من السماء و كل يوم يكتشفو فيه معالم و تفاسير جديدة مواكبة للعصر متاع التجمعيين و نافذة على عامة الشعب.....
و في بداية القرن 21 تفرضت الأنترنات فالبلاد بقدرة قادر و خذات صدى كبير عند جل العايلاة التونسية و ولات حتى إلي ماعندوش يتداين و يشري لولادو كمبيوتر باش يكونو مواكبين التقدم العلمي و هذا ما فتح نافذة على العالم الخارجي إلي عامة الشعب ماكان يسمع منوا كان إلي تتمزا بيه الحكومة من وراء الشاشة الصغيرة و الأنباء إلي في أغلب الأحيان مفبركة على قياس الحاكم.
        و بدات تظهر رجال جديدة فالبلاد، صحيح من وراء ستار الصفحات الإلكترونية و أسامي فالغالب مستعارة، هالوضع الجديد عطا فرصة لكل مواطن أنو يعبر على مواقفو من غير تحفظ لأنو كان يظنو أن الشبكة العنكبوتية ممكن تحمي هويتو الحقيقية و الإسم المستعار لا يمكن أن يدل على صاحبو، و عملو مدونات و عطاو أجنحة لتعبيرهم و خذاو غرضهم في التنكيل بالنضام و المساوء متاعو و الترافيك متاع أقاربوا و المقربين من التجمعيين و أعيان البلاد و البوليس السياسي طبعا، إلي هو زادة ماإدخرش جهد و سعى في أقرب الأوقات باش ينسج خيوط على الشبكة العنكبوتية و يعرف من كان وراء تلك الأسامي المستعارة و المدونات إلي ضربة النظام الفاسد.
          و من وقتها بدات عمليات الإعتقالات تحت جناح الضلام، و من وقتها عرفو المدونين الأحرار آلة الإرهاب إلي كانو يتصورو أنها موش ممكن توصللهم، و إكتشفوا بشاعة التعذيب و الإنتهاكات و الإغتصاب للأبناء كان أغلبهم لم يتجاوز بعد سن العشرين.
         ومات إلي مات و تحطمت حياة إلي قدر يعيش و يصمد لهاك التعذيب، و إلي تذكرت أسماؤهم من طرف المدونين الأحرار و الصحافيين النضاف لا يتجاوز عددهم فالحقيقة 10 بالمأة من العدد الحقيقي للي ماتو و تعذبو في أروقة وزارة التنكيل و لا فالحبوسات إلي تخصصت في إتلاف الإنسان و كل ما يربطه بالعالم الخارجي.
           و جا اليوم إلي تفوق فيه الحق على الباطل، و جات القطرة إلي فيضة الكاس، البوعزيزي إلي حرق نفسو، كان ممكن الخبر يمر كيف ما مرت الأخبار إلي سبقتو من الناس إلي حرقو نفسهم ولا حرقوهم و إعتبروهم مجرمين، اما حكاية البوعزيزي خطفوها الشباب متاع الفايسبوك و تويتر(إلي الناس كانت تتمنيك عليهم و يقولو عليهم شباب مايع)و قيمو بيها القيامة، و تناقلت بين الناس إلي حسوا فيهالمرة بالتعدي على الكرامة متاع التونسي، و الغدر بيه، و ببعد السلطة على المواطن و عدم إكتراثها بالأوجاع إلي كانت مأرقتلو نومو و مانعتو حتى من الحلم كيما عباد ربي الكل، و ما فاتت أيامات قليلة حتى لقى روحو "زابا" إلي ظن أنوا بنا صرح كبير يحميه من الشعب، وحدوا في مكتب مخيف، كل إلي حولو و كانو ينفخولو في صورتو هربو و خلاوه يخاف حتى من خيالو، ما لقا بيها وين، فصع (هرب).....
           و جات حكومة في جرة حكومة و ما زالت لبلاد تلوج على دستور جديد يمكن باش يضمنلها حقها و ما عادش حتى حاكم يضحك علينا بكلمتين و بعد ما يشد الحكم يقول "أنا أو لا أحد"
         عاشت تونس حرة مستقلة و عاش شعبها الأبي و الله يرحم كل من عطى قطرة من دموا فداء لها البلاد و لها الشعب .


jeudi 12 janvier 2012

شباب الثورة





شباب 14 جانفي
شباب مهول جبار
شباب فرظ صدرو للخرطوش و النار
شباب ثاير ما يخاف من الموت
شباب أخيار
طلعوا في يوم مشهود على الداخلية
بعسكرها و شرطيها المدجج بالعصي
 بالغاز المميت و بنادق مشهورة بقتل الأحرار
طلعوا و ما فيش في قلوبهم لا خوف و لا إختيار
غير تحرير بلدهم من ضلم زابا
 رئيس عصابة أشرار
أخذ حقوقهم بأيدي طرابلسية
عاشوا بالغدر وأكل مال بلد
ما عرف في حياتوا غير العز
و الكرم و شهداء أبرار
هزموا الروم و الفرنسيين و كل محتل
إفتكر روحو مغوار
شباب تونس ما هرب في يومها من الموت
وبهر العالم من أمريكان 
هنود، عرب و حتى شعب اليابان
شباب تونس شباب أبيّ مغوار
شباب 14 جانفي الأخيار
والله و كل من إندعى السياسة
و أحزاب يمين يسار
حتى الإخوان و المعارضين و جماعة حقوق الإنسان
و مناضلين غلقوا باب دارهم
و تخبوا مثل الفار
لمّا سمع هزيج أقدام فرسان الثورة
إلي قلعوا من 50سنة الإستعمار
رجعوا من ثاني بعزيمة من فولاذ
إتحمى 23 سنة في النار

lundi 9 janvier 2012

حديث توانسة


إلكلام إلي باش إنقولو ليوم موش باش يعجب برشة ناس، بصاراحة خممت برشة قبل مانبدى نحكي و قلت مافماش خير من إلحديث بتونسي هاك اللهجة إلّي بدينا من مدة نفقدو فيها،ككإلمثل إلي يقولو بابا ألله يرحمو: يا إمبدل خطوة بخطوة ينساهم لثنين،ولّ إلّي يتبع مشية لحمام ينسى مشيتو، و أنا في هالعمر هذا 53سنا نتفكر فالسبعينات (1970-1980) بدات ظاهرة الهيبي و هاك إلبس متاعهم "إشرليستون وإشعر إلمشبشب و السواري و إلمراول إلمفخفخا" وقتها كل الشباب التونسي تبعهم بصفة مهولة ولبناة ولات تلبس زادة كيف ارجال و فقدنا لمدّة هاك الطابع ولهوية إتونسية وولينا مجتمع متقدم كي إلغرب بطبيعة، أمّا خصارة متبعناهم كان فتهنتيلة أما إثقافة ولنتاج ولبداع مارينا منوا شيء .
وفاتت ليّام وجات لموضة إلميني ودجين وهذا ملي بدات إثمانينات، و بطبيعة كنا إسبّاقين أو ولات بناتنا منلميني موش خارجين أو بر أحكي مع اي بنة أختك ولا غيرها تتقلب إدنيا سافيها على عليها و إلأم تندب في وجهها باش يردولي بنتي هاملة و لّ تحبوها ططلع معقدة، ولّ ماتلبسش كي أندادها وهات ماكلاوي،أما إلبو علاما تنحيلو في ولديه لمرا و عل ما ولّ يشوف فيه فيشارع من بناة معرية ماعادش يقبل لحديث فلموضوع بتاتا أو ولّ ربّما يخير لمرى بلميني عل مرى إلي بسسفساري.
توة سيدي بعد لطولت عليكم هلحكاية إنشوفو ليوم في تونس أخرى، نسينا إلقشابية و البرنوص و الجبة و الشارليستون و إدجين المحزوق و إلدنقري و نسانا نساو إلميني و الشارلي ولموسلين و لبونتي و أوروبا ماعادش تلهمنا و تجلبنا و لبسنا لبس أفغانستان وإلباكستان و إسندباد و إنسانا ولاو سعوديات و إيرانيات و أفغانيات…. منين جانا هلإلهام إلكل؟؟ منين جاتنا هلتقاليد؟ هافقدان الهوية بسهولة هذي؟ ليوم إنشوف في تونس أغلب النسى لبسة الحجابو برشة منهم إنيقاب فردنمرة، رغم إلي 90 بالميا من أمّاتهم من غير شك إلبنات إلي في السبعينات و الثمانينات لبسة إلميني و الشرلي و إلعرية و إتفزعيك ببدنهم في إشطوط إدوبياس خدّام، ياخي إثقافة إلي تعلموها فحياتهم تمسحت في لحظة؟ برة نعتبرهم إلكل تابو، هذي حاجة باهية لكن علاش تحرم أولادك باش يعيشو إلي عشتو إنتي و يشيخوا فلبومات و إسهريات كيما شختو إنتوما و فرضتوه عل ولديكم إلي كان في فكرهم أو معتقداتهم بدائيين و كانو خارجين من ضلم و قهر المستعمريين و رغم هذاك إلكل قبلوا باش يخليكم تعيشو إلحياة إلي حبيتوها,
آخر حاجة باش إنقولها: راهو إتوانسة في أغلبيتهم مسلمين أب عن جد، ولكلهم يحبو دينهم و ترباو على إتسامح و إتفاهم و إلأغلبية عيّاشة يحب يخدم و يكفي دارو و أهل بيتو و ما يتعدا على حتّ حد و ما يقبلش إضلم، و إلي صاير من تطور فالبلاد وإلعباد إيخوف على خاطر إتونسي كي يولي يحب كل شي ليه و ماعادش يخمم فلبلاد ويحب يفرض رايو عن إناس و يفك و يقطع إطرق ولي يحب إيولي أمير أو مجاهد أو شهيد (حتى لوكان يحرق لروحو) ندخلو في ريسك إلفوضى وإلهمجية و لا عاد ينفعنا لا إسعودية و لا إيران و تولي تونس تشبه إلكل شيء في أفغانستان يعني موش إلبسة برك امّ حتى إلبلاد.  

سحر الليل

أرى عيناك لا تبارح القمر
و دمعك لا يزال ينهمر، لم ينقطع
أخوفا من زوال القمر؟
أم حزنا لفراق ليل ساحرا
لا ينبغي الحزن لفراق لا يتعدى سويعات
في إنتظار لقاء أجمل و أبهى
يجلب للعين و القلب أحسن شفاء
فما للقمر بدون الليل وجود
و ما لليل بغياب القمر سحر و نفوذ