lundi 11 juin 2012

لغتي مفخرتي


أتركوني أتكلم بالعربية الفصحى
ما بقيتش قادرأتمم  جملة وحدة
بقى الكلام ديماء من غير جثة
ديماء غطت شوارعنا الفاسحة
من تونس لمصر لليمن الحرة
لليبيا للبحرين لسوريا العزة
لا تتركونا نبحث في لغة ثانية
فلغتنا ليست حكرا عن القتلة
يا شباب لا تيأسوا من رب القدرة
ديماؤكم مثل المطر تنزل رحمة
لتسقي أرض عدت سنين قاحلة
أرض أنبتت نساء و رجال الثورة
راويين حرية، كرامة و مفخرة
يا شرطة، يا جيش يا حماة الحمى
كيف أصبحتم هاته اليد القذرة
كفوا عن قتل أبنائنا البررة
فلن يحميكم الطاغية إذ إنكسر
و لن تزال عنكم الرائحة الكرهة
فدماء الأبرياء لن تجف أبدا
و أنتم يا ملوك، يا حكام و رؤساء
ألم تعهدوا ما فعل ربكم بفرعون؟
زعيمكم الذي طغى في البلاد
و ظن أنه سيكون رب العباد
ألا ترحموا خير أمة أنزلت في الناس؟
شعب إتقى الله و سار في درب الهدى
شعب كلّ من القهر و الظلم و المنظرة
فغازكم و بترولكم لن يدوم أبدا
و سيبقى الشعب برجا شامخا
أتركوني أتعلم لغتي العربية الفصحى
لغة أجدادي و تاريخ بلادي
لغة الشعر و الأدب و العلم
لغة الثورة و الحب و الأمل
سأرفع رئسي و أمشي ثابتا
فصنيع شعب ثائر سيضل مفخرة
تحكي عنها أقلام باللغة الأم
 اللغة العربية الفصحى

jeudi 7 juin 2012

عاشت تونس، عاش الشعب


التوانسة بجميع إنتماآتهم الحزبية و الدينية فالكلام ما عندك ما تقول فيهم، الله مصلي عالنبي حطهم عالجرح يبرى.
 الكل ضد العنف، بالطبيعة اللفضي و الجسدي. أما أقل كلمة موش في بلاصتها و إلا ما تعجبوش و ما تخدمش مصالحو، يترمى في خناقك واش باش يسلكها.
 خاصة إذا الحكاية قدام الكاميرا، كيف تسمعو، تقول أكثر واحد متفتح و متفهم و يعرف يفرق بين الحق و الباطل، و يبوك يمسو حد بكلمة، سبحان من هز عبد و حط عبد، يتنحى الماسك و يظهر على حقيقتو، و يخرج القرينتا إلي فيه (مانا الكل نشعلو بالقرينتا) وقتها إحبلو عزام و راسو عريان.
 كانو من جماعة "عنقني" و إلا ملي يقولو عليهم "يساريين" و إلي ينسبولهم الإلحاد،يولي يحكي باش قال ربي و النبي، و عمرو الدين و الشرع ما نص على هذا و هات من هاك اللاوي، كينك في حضرة مفتي.
 و كانو من الخواجية و إلا بصفة عامة من الأحزاب إلي تندعي بروحها "إسلامية" يولي يسب و كشاكشو طالعة و ماعاد يفهم شيء و يوصل في بعض الأحيان حتى للكفر، و يكذب علماء الدين إلي ما يأيدوش موقفو المزبل.
خلي عاد كان نحكيو عالحاكم "البوليس" إذا حضر في بلاطو متاع أي برنامج و تسمعو يحكي تقول قداش ظلمناهم: أحنا الكل توانسة، أحنا نفديو تونس بدمنا، أحنا ولاد الشعب الزوالي، أنا بوك، أنا خوك و أنتي أختي، أحنا نحميو الشعب و ما تنسوش كان موش أحنا حمينا الثورة راهي مانجحتش (يعني دوبلت) و خاصة الصحافيين إلي يمثلو الصلة الرابعة فالبلاد، ما نخلو حد يتعدى عليهم، هذوكم صوت الشعب و واجب علينا نحميوهم، و مناش مع حتى حزب أو أي طرف سياسي، أحنا معا تونس أكهو.
و يبوك يستفردو بصحافي زوالي و إلا مواطن عادي، عينك ما تشوف إلا النور( تقول واحد ميت بالشر طاح بقصعة كسكسي) من متراك، مشطة و بونية و سبان و إيهانات و تكركير و تمرميد و...
الأغلبية متاع الشعب كيف يحصل، ياكلها في جلدو و يسكت مالخوف و الرعب إلي عاشو، كان بعض الصحافيين و الحقوقيين إلي ينجمو يوصلو صوتهم و يعمل منها قضية و يحاول بكل الطرق يوقفو عند حدو، قليل إلي ينجح، بالطبيعة على خاطر في تونس عندنا السيستام "د" و هو التصرف حسب الوضع بجميع الوسائل المتاحة من كذب، إدعاء بالباطل، شهود عيان من الحيط و إلخ...
و كي يجي قدام القضاء وإلا حتى قدام الكاميرا يبرر موقفو بسهولة: إما غالطين فيه، و إلا البادج متاعو ما كانش ظاهر، و إلا يتهموه إلي هو إتعدى عالحاكم و تملح من السلطة، و خان مبادئ الثورة، و إذا لزم يجيبو واحد بوليس مشلط و إلا يدو مكسرة و يتهموه بالإعتداء عليه بالعنف الشديد و يطلبو القصاص منو، و بطبيعة هذي حاجة مسهلش منها في تونس (الكذب في المصالح جايز) و ياما في الحبس مظاليم.
إنشاء الله تونس ديما بخير.

lundi 7 mai 2012

يا ويلكم من يوم غدوة



كيفاش الواحد يجي لعينوا و يطمزها؟
         هذا ميثال قديم و يقولو بيه باش يبينو إلي الواحد ما فماش ما أعز من عينيه عليه، لكن بعض الناس إلي ما فيهمش خير و إلي حسدهم و بغضهم عمى بصيرتهم، يولي يطمز عينو باش ما يشوفش غيرو في خير ونعمة.
         لبارح تفرجة في برنامج على قناة "التونسية" يحكيو على قصة محمد و رشاد 2 من جرحى الثورة و على ما تأثرت بمصيبتهم عديت ½ البرنامج و دموعي تجري، ما تتصوروش قداش تألمت و قداش حسيت روحي مذنب في حقهم كيف أغلب التوانسة و بطبيعة السياسيين في طليعة المتنكرين.
         أي واحد في العادة كيف يلقي صدرو للدفاع على شخص معين، هاك الشخص يكون مدينلو بحياتو، و مهما يكلفو إرضاء الذي تطوع لفدائه بدمه و جسده فلن يكون أبدا كافي لجلالة و قيمة الموقف.
         و إذا إعتبرنا كل من توفي أو قتل في أيام الثورة شهيد، و تم الإعتراف به و تقديم التعويضات اللازمة لأهله، فالحقيقة أن مال الدنيى الكل في أغلب لحيان ما يعوضش عزيز علينا، لكن معا الوقت يبرد الجرح و تهدى النفوس كل ما يتذكر إسمو و الترحم عليه و وصفو بالشهيد.
          أما الناس إلي تجرحو و بقاو يعانيو في جروحهم و لمدة أكثر من عام، ما حسوش في يوم واحد أن البلاد إلي ضحوا من أجلها و الناس إلي تجرحو في بلاصتهم وقفو معاهم في محنتهم و عاونوهم و وفرولهم أسباب الراحة و الشيفاء، إن كان بطبيعة ممكن. و إلي يعيش يوم واحد مع مجروح يفهم أن إلي ماتو أحسن ألف مرة ملي بقاو عايشين، على الأقل تمتعو بالشهادة و الراحة الخالصة، أما المجروح لخذا شهادة و لا شكر و لا حتى أدنى إمتياز بل بالعكس جنى على روحو و على عايلتو إلي في الغالب متعذبين أكثر منو و يعانيو فالويل باش يوصلو يلقاو شكون يساعدهم و إلا حتي يسمعهم، و ما نحكيلكمش على وضعهم المادي، إلمزمر فيهم عندو ديون متلتلة و مرهون عند الكلينيك و عند السبيطار و الفرمسي و العطار......و بطبيعة مازال يستنى فالحكومة و لجنة تقصي الحقايق باش تستعرف بيه و ربما تداويه، و فإنتظار الإعتراف يهان المجروح و أهلوا و ينبت فيه الدود و يولي أمر شفاه من الجرح صعيب ياسر إذا موش مستحيل.
           يا ناس فيقو بجاه ربي و حاولو تحسو بيهم ولو لساعة و حدة، يسيدي موش لازم تعاونوهم بالفلوس، ماهو التونسي أطلب منو كل شيء كان الفلوس لا، زوروهم، طلو عليهم، لكان كل تونسي يعطي ساعة من وقتو للإهتمام بجريح فدى بلادو بدمو و مستقبلو، تو الكل يتعافاو من غير طبيب و صدقوني العزلة إلي يعيشها المريض في غالب لحيان تقضي عليه قبل المرض بذاتو، هكاكة على الأقل المجروح يحس بوقفة الناس معاه و يقبل في داخل نفسو أن ما أعطاه للثورة جابلو معرفة الناس بيه و تقدير ما قدم لبلادو.
           أما الجماعة السياسيين و إلي هوما أكبر المستفيدين من الثورة و ما قدمتلهم من مزايى و خرجتهم من الضلمات إلى النور، راجعو أنفسكم قبل مايفوت الفوت، تفكرو الناس إلي ركبنكم على ظهورهم باش تقعدو ليوم هلقعدة هذي و تحكمو بالشكال و العقال، وين كنتو و وين صبحتو؟ بعد السجون و الإعتقالات و سنين الهروب و النفي، هاكم الفاتقين الناطقين فالبلاد، خذو عبرة من إلي عديتوه و إحترمو الناس إلي ضحات بالغالي و الرخيص باش يبدلو الحاكم الظالم على أمل أن الحاكم الجديد يكون صادق أولا مع نفسوا و ثانيا مع الناس و ثالثا معا ربو.
           أم الجريح، المنهارة و المنهكة و إلي امالها في أنها تشوف ولدها إلي يتعذب و يذبل من يوم إليوم قدام عينيها يرجع يمشي على سقيه كيف الناس الكل، يرجع يعيش و يتنفس و يأمل في غدوة كيف الناس الكل، ماهيش طالبة المستحيل، ماهيش تستنا في تعويض على معاناتها و سهرها الليالي الطوال باش تخفف من آلام إبنها، مهيش تستنا باش الدولة تعطيها ولد آخر غير ولدها، تمشي باش تقابل وزير حقوق الإنسان فماش ما يعطيها أمل و إلى يوعدها بالعناية بولدها فلذة كبدها، يرفض ببساطة مقابلتها و تطرد من الوزارة؟؟؟ مذا يحصل؟ كيف يمكن لأي تونسي مهما كان منصبه أن يتعالى على أم الجريح؟ أليست من خسرة كل شيء من أجل الحرية؟ أليست من قدمت أغلى ما عندها لتكون أنت الآن في السلطة لتسترد لها حقوقها و تظهر الحق لأصحابه و تأمر بالعدل و تنصف المظلوم و تدين الظالم؟ كيف تناسية هذا؟ لازلت في خطواتك الأولى و تترك كل ما دافعت عليه طول حياتك جانبا و تظلم الناس من أول يوم كلفك الله بأمرهم؟
أبكاني الجريح، بآلامه و عجزه و نسيانه، و أبكتني أكثر أمه التي أذلها الحاكم التي كان ترجو عدله و إنصافه.
يا ويلكم من يوم غدوة

mardi 3 avril 2012

قدماء التجمع و تعامل المجتمع معهم




           بعد 14 جانفي و تزايد كره و إحتقار المجتمع التونسي بجل طوائفه و إنتماآته لأزلام النظام المقصي، أبناء و بنات الحزب الذي قهر البلاد و إمتص دماءها لمدة 23 سنة، و بعد ما ضن الجميع أنه سيقع تتبع لهذه الفئة أو على الأقل لقياديها و ناشطيها المخلصين لبن علي و التجمع، وما القضايا المزمع رفعها ضدهم و تجريمهم الذي لا غبار عليه في البداية، و التصريحات السياسية التي نادت بإقصائهم و محاسبتهم و تسليط أشد العقوبات على من إستغل بصفة مباشرة أو غير مباشرة إنتماءه لهذا الحزب.
         مرة الأيام و الأشهر، و جاءت الحكومة الأولى و الثانية،و صدر حكم مستعجل بحل التجمع، و إسترداد أملاكه و كل أملاك الدولة التي كان يتصرف بها، بموجب أو بغير موجب، و إلزام كل الناشطين و العاملين بدار التجمع، و الذين هم في الغالب ينتمون لشركات وطنية و يتقاضون أجورهم منها، أن يلتحقوا بمؤسساتهم و يتم التعامل معهم كباقي العمال، و الذين لا يرغبون في العودة إلى مؤسساتهم يمكن لهم الحصول على التقاعد المبكر.
          تمضي الأيام،الكل يتوعد و يتساءل و يرمي باللوم على من سبقه، و جاءت الإنتخابات و إنشغل الكل في إنشاء أحزاب و تيارات جديدة و بدء إندثار التجمعيين و خاصة منهم أصحاب الخبرة و الدراية و الذين تم ضمهم بوعي أو بغير وعي من جل أحزاب الغفلة، الذين و جدوا فيهم المنقذ و الورقة الرابحة التي يمكن أن تجلب لهم عديد الأصوات.
                بعد مرور سنة و نصف على الإنتفاضة و هروب بن علي، و بعد حكومة الغنوشي التي لم يطل حكمها و التي إتهمت بالتستر على أزلام النظام السابق، جاءت حكومة السبسي و بادرت بمحاسبة التجمعيين و صدر أمر بمنعهم من المشاركة في الإنتخابات أو بإنشاء أحزاب، ثم تراجع السبسي، بضغط من حكومات أجنبية مثل أمريكا و فرنسا و التان لم تدخرا جهدا في الدفاع عن بعض الوجوه التجمعية القديمة، و أعدت الحكومة قائمة بأسماء لم تنشرها، لكن صرحت أن القائمة تحمي التونسيين من التجمعيين الذين تمت إدانتهم و لا فائدة من التشفي منهم.
          اليوم و بعد 100 يوم و نيف من حكومة الترويكا المنتخبة شرعيا وما لا يقل على 5أشهر من تكوين المجلس التأسيسي الضامن في الأصل لحماية حقوق التونسيين و الذي تعهد بإسترجاع الأموال المنهوبة و رفع الضرر المادي و المعنوي عن التونسيين، لم نتوصل بعد إلى إصدار أي قانون يدين أي المنتمين، بل بالعكس، لاحظ التونسيون أن أغلب هؤلاء التجمعيين يتمتعون بكل حقوقهم و يتصرفون في أملاكهم  التي حصلوا عليها في فترات سيطرتهم على البلاد و أموالها و الذين هم مطالبون في الواقع بإرجاعها لأصحابها أو لخزينة الدولة إذا لم نقدر على معرفة أصحابها الأصليين.
          أما التجمعيين الذين رجعوا للعمل بمؤسساتهم أو الشركات الوطنية التي ينتموا إليها أصلا، وهو الموضوع الذي دفعني لكتابة هذه الورقة، هؤلاء لا زالوا يعاملون بإمتياز على بقية العمال، و لا أحد، و لا أي مسؤول يملك الشجاعة او القدرة على معاقبة هؤلاء، يمكن أن يكون فمة أوامر لا علم لنا بها، و التي توصي رؤساء المؤسسات بعدم التعرض لهؤلاء؟ مراعاة لإنتماآتهم القديمة و التي يعتبرونها خدمة للوطن؟ ربما يخافون ردود فعلهم إذا ما طالبوهم بالقيام بواجباتهم كبقية الموظفين؟؟؟
           أسئلة كثيرة تطرح و لا إجابة، من يملك الحقيقة؟ مااذي يريد إخفاءه أهل السياسة؟ لماذا يخافون منهم؟
           أحد هؤلاء التجمعيين ( موظف سامي )، ينتمي للشركة الوطنية للسكك الحديدية التونسية و الذي تم ضمه لمؤسسة التجمع لمدة 20سنة، يتقاضى أجرته و كل الإمتيازات القانونية و الغير قانونية من الشركة الأم كل هذه المدة المنقضية، تم إلحاقه أو بالأحرى رجوعه للعمل بشركته بعد حل التجمع، و منذ ذلك الحين أسند له مكتب و كمبيوتر و أوراق، لكن لا يحضر إلا نادرا (مرة أو مرتين في الشهر و غالبا تكون زيارته للمكتب لا تفوت ½ ساعة) و رغم هذا التغيب المستمر، و الإستهتار بنضام الإدارة و قوانينها التي تلزم كل الموظفين، فهذا السيد لا يجد من يحاسبه أو يعيده للجادة أو يعاقبه كما تنص القوانين الإدارية المعمول بها.
           لماذا يعامل هذا الشخص بالذات بهذه الطريقة؟ لماذا لا يسأل عن غيابه؟ لماذا تدفع له من المال العمومي أجرة لا يستحقها؟ هل أصبح إنتماؤه للحزب الذي نهب البلاد لمدة 23 سنة ميزة تجعله فوق المحاسبة؟
الأسئلة عديدة و المجال لا يتسع لطرحها، لكن أترك لكل مواطن أن يطرح الأسئلة التي يراها، ربما يجد لها مبررا، اما أنا فلا أقدر على فهم ما يحصل فالسياسيون الذين طلبوا أصواتنا بالأمس  ليحققوا لنا العدل و الحرية و المحاسبة، هل تناسوا وعودهم أو أجبروا على تناسيها و تركوا الذئب يرعى بجانب الخروف.

lundi 26 mars 2012

التونسي يكره الحرية، ماتقليش كيفاش؟




        التونسي للتونسي رحمة، هذا إلي تعلمناه وحنا صغار من عند والدينا و إلا من عند مربينا و معلمينا و حتى أساتذتنا. و باش الواحد يحس بخوه التونسي و يفكر فيه و يحاول يجتنب كل ما ممكن يسيئلوا و يعرضو للخطر يلزم يشوف كل حاجة ممكن تقلقو هو و إلا تعكر حياتو و تعرضها للخطر، هكا كيف يفهم إلي يوجعو هو راهو يوجع جارو و كل واحد يعيش معاه في بلادو، يولي قادر باش يتجنب الأذية.
الأذية اليوم يا توانسة هي عدم الإكتراث بالطبيعة و عدم حمايتها و المحافظة عليها ولي هي الضمان الوحيد لحياة أولادنا و صحتهم خاصة، و إذا أحنا اليوم نقضيو عليها و ما نخليوهاش تتنفس، تموت هالكطبيعة و أولادنا يموتو بلاش بيها.
و البعض من التوانسة إلي غير مسؤولين ولي موش حاسسين بالخطر ولي يضنو انهم كيف يلوثو البلاد قاعدين يلوثو فالبلدية و ينتقمو منها يلزم يفهمو إلي هوما يلوثو فلحقيقة كان في رواحهم، في بلادهم، فالطبيعة متاع أولادهم، وكل واحد يستهزئ اليوم بها البلاد و يوسخها راهو غدوة هو إلي باش يشم الريحة الناتنا.
Ajouter une légende
نتكلم اليوم على الوضع الخايب إلي شوفتو في مدخل تونس "الخضراء" وانا جاي للخدمة نشوف في كداس متاع فضلات و بقايا الياجور و الحطام ملوح فوق الحشيش و الزهور إلي كنت إنشوفها في مدخل تونس الجميلة و إلي كل واحد يبتهج و هو داخل لتونس، لكن أصحاب الشر و إلي ما يخممو كان في نفسهم و في اليوم هذا باش يتخلصو من فضلاتهم بقل تكليف و بالإسائة للهالبلاد إلي محتضنتهم و منورة عيشتهم. و بالطبيعة في غياب المراقبة متاع البلدية، إينعم في غياب المراقبة، على خاطر التونسي عمرو ما قدر يتقدم في مخو، لتوة مازال يلزمو مراقبة مستمرة باش يعيش و يتعايش معا الناس، إلى يومنا هذا التونسي مازال يرفض الحرية، بطبيعة مادامو يلزمو حد يعس عليه باش يعيش في المجتمع. حد يعس عليه باش يستحفض على بلادو، باش أولادو غدوة تلقا وين تعيش يلزمو شكون يقود بيه باش يعرف مرة أخرى معنا الحرية إلي تحرم منها سنين و إلي وقت إلي تهداتلو رفضها و طلب شكون يعس عليه.

mercredi 14 mars 2012

الحس بالمواطنة: زعمة مزال فما أمل؟



البارح كيف خرجت من الخدمة خذيت الكار من تونس للزهراء (TUS)  أو ما تسمى بالنقل الحضري، زعمة الكار الباهية و إلي كل حد عندو بلاصتو، لا تدزني لا إندزك، بعد ما تعبة الكار و نادات إلي تقص التساكر للشوفور( إلي كيما العادة خلا الكار و مشا يعمل في قهوة) إنطلقت الكار من محطة برشلونة، و لا يوريك و لا يروعك ما خرجنا من المحطة لشارع قرطاج إلي بسيدي و سيدي: عيشك قدم شوية، عيشك وخر شوية، وإلي واقف في وسط الكياس، و التاكسيات إلي مسكرة الطريق و تحب تتعدا قبل الناس الكل و سيارة الأجرة متاع سوسة و صفاقس إلي نرمالمون يعبيو من محطة المنصف باي و إلي جاو إلبرشلون باش يخطفوا الركاب متاع القطارات و التاكسي الجماعي إلي هوما زادة خذاو بلاصة في محطة برشلونة و يبداو يدورو، يمشيو و يجيو قدام الكيران باش إيفكو الركاب من الوسايل لخرى، إلحاصيلو سوق و دلال..
بعد حوالي 5دقايق تمكن شوفورنا لعزيز من الخروج لشارع قرطاج و إنطلق، يا سيدي و ما نحكيلكمش هاك الشفور كان في سينة صبح في سينة أخرى، رغم إلي حاطط إذاعة الزيتونة بصوة قوي و إلي كانت تذيع في آياة قرآنية و أحاديث دينية، السيد ولانا شوماخر، هاك الكار ولاة سيارة سباق، و بدا إيزقزق بين الكراهب و لا يوقفوا لا فو روج و لا ستوب و لا أولوية، حتى المحطات إلي فيهم مسافرين كانو يشيرو باش ياقف ما يتلفتلهمش جملة، الراجل تقول ركبوه الجنون، أما الأدهى و الأمر، إلي حتى واحد وإلا وحدة بما فيهم أنا من الراكبين و إلي متأكد كانو مرعوبين من طريقة السياقة متاعو لا تجرأ و طلب من الشوفور باش يرجع شوفور طبيعي و يسوق بصفة طبيعية و رصينة ليس للمحافظة على روحو و إلا على الحافلة إلي ياكل منها فالخبز بل علينا أحنا إلي دفعنا فلوسنا باش إنروحوا لديرنا سالمين.
 هذا علاش إليوم حبيت نتكلم على الحس بالمواطنة و على ثقافة النعامة إلي كل ما تحس بالخطر تحط راسها في التراب و إلا ثقافة التسرديك متاعنا إلي الحس أكثر من الفعل، تسمعو يعيط تقول باش يفتح إفريقية و هو في الواقع إيبهبر أكهو، يا توانسة يلزمنا نتكلموا على حقوقنا من غير سب و لا تجريح "بالتي هي أحسن" كيف ما يقول سيدنا عليه الصلاة و السلام، إلي يشوف واحد غالط إيفيقو و ينصحو و يوقفوا عند حدو إذا الغلط متاعو إيمس مصالحنا ولا حريتنا.
و اليوم خصصت بالحديث الشوفرة و وسائل النقل العمومية، إلي من وقت إلي هرب المخلوع وقع فيها تسيب كبير و ماعاد حد يحترم القواعد الأساسية للسلامة، و ولينا إنشوفو في سيارات متاع نقل سلعة تعبي فالعباد إلي يقبلو باش يقعدو على كراسي لوح ولا مدرية و يزيد إخلصو المعلوم متاع التنقل كيما الوسايل لخرة، و يا لندرا عارفين إلي ماهمش مسوقرين و إذا الله لا يقدر يصير أي مكروه إلى هاك السيارة مشاة فيهم و في الحشاشة و حتى حد ما يستعرف بيهم، وما يكفيش هالكلندستان (les clandestins)  باش يركبو الناس في وسيلة غير سامحة لنقل المسافرين، الوسيلة إلي عادة مهيأة لنقل 2 ركاب يركبوا فيها 10 إذا موش أكثر، و في هالحالة إنلوموا علي يركّب و إلا إلي يقبلو باش يركبو بفلوسهم في ظروف كيما هكة؟
 الشيفور متاع التاكسي و إلا الكار الصفرة و إلا الزرقاء و حتى متاع النقل الريفي و سيارات الأجرة، على كل مواطن يستعمل هالوسايل هذي و يلاحظ أي تصرف ممكن يعرض الركاب و إلا الوسيلة و إلا أطراف أخرى للخطر: من إفراط في السرعة، عدم الإنتباه للأضواء و علامات المرورباش ينبه بتربية من غير غش و من غير مساس بالأخلاقيات و لا عياط، بصفة متمدنة السيد السائق و إلا الشيفور و يطلب منوا باش يحافظ على روحو و على الناس إلي مكلف بإيصالهم في سلام و يحترم قواعد المرور، و صدقوني إلي راهو إذا تكلم أي واحد بأدب و ما إستجابش السيد هذا، الناس الكل إلي فالوسيلة هذي يساندوه و يفرضو على الشيفور الإنسياق لرغبة و سلامة المسافرين و هكة كيف يلقى روحو قدام أغلبية يولي يرضخ و يحترم. أما بالنسبة لسياراة التاكسي فرجاء من كل مواطن يلاحظ عدم إحترام السائق لقواعد المرور أنو يوقفو عند حدو أولا بطلب متحضر بتربية و إذا ماستجابش، تطلب منوا باش ياقف و تنزل و تاخذ الرقم المنجمي متاعو و تبلغ عليه و هكا تكون قدمت خدمة ليه هو و لكل المواطنين.
 إلحصيلو، نتمنى أني نفيدكم بها الكلام هذا و نتمنى باش التصرف متاع كل مواطن تونسي يولي متحضر و مسؤول و نوليو عندنا تقاليد باهية كيما البلدان المتقدمة و نولين نحترمو بعضنا و ما نتعداوش على حقوق غيرنا.

mardi 13 mars 2012

يوم الأنترنات و مزية العالم الإفتراضي

           ليوم حبيت نكتب حاجة، حبيت نخرج من الصمت و نقول أي حاجة إلي بيه الفايدة أني نكتب حاجة موش كيف العادة، فالعادة تجنبت باش نكتب فالسياسة موش إختيار فالواقع، اما خوف كان ينتابني ملي عمري 15سنة أول مرة كتبت شعر، ساعتها كنت مغروم بجيل جيلالة و ناس الغيوان إلي جابولنا لوغة جديدة فالتعامل مع القضية العربية و غناياتهم كانت تشعل فينا الوطنية و الكرامة، وقتها في أواخر السبعينات كوّنت أنا و بعض الأصدقاء و الناشطين بدار الشباب فرقة موسيقية عندها طابع فرقة ناس الغيوان و بعد ما غنينا أغاني ناجحة متاعهم خممنا باش نعملو غناية متاعنا، و كتبت وقتها أول غناية من تأليفي "نحنو العرب" و بعد عديد من التحضيرات أقترح علينا من طرف رئيس دار الشباب أن نقدم عملنا في إحتفال عيد الشباب و الذي يحضره رموز الحزب الإشتراكي الدستوري و هو طبعا الحزب الحاكم وقتها.
         يوم الإحتفال كان يغمرنا سعادة لا توصف و إعتزاز بالعمل إلي حضرناه و غنايتنا كانت تبدولنا أحلى غناية خير حتى من غناياة ناس الغيوان.
        و بعد ما كملنا العرض متاعنا و بعد ما كنا ننتظر شكر المسؤلين على العمل متاعنا ما راعنا كان رئيس دار الشباب يكفر و يتهز و يتحط على االكلام إلي غنيناه و إلي ماكانش عندو علم بيه و تعرض لتوبيخ من طرف الحزبيين الحاضرين.
بعض كلام الغناية :
نحنو العرب ناس كبار و فالدول عندنا قيمة
نحن العرب ناس كبار و علاش خليتوا بينا
حطيناكم عالكراسي باش تقيمو علينا
سد من السدود الكبار في الشدة يحمينا
ياخي خيبتوا ضنونا و تركتوا للكلاب ديرنا
و جعلتوا منا
 ديار الغربة ديارنا و بلدان أوروبا مآلنا
           و من هاك النهار، تخليت على الكتابة بالعربية و في كل ما يمس البلاد و السياسة و وليت نكتب كان فالحب، بالطبيعة كيف ما نشوفوا أنا.
           و مشات أيام و جات أيام و صار التحول، إلي عمل زوبعة في تاريخ تونس و إلي تعدت البلاد من مرحلة بورقيبة إلى مرحلة الزين من غير ماصار حتى مشكل، و الناس الكل فرحة بالوضع الجديد، و إلي الكل كانوا متأكدين أنوا مش ممكن يولي أسوأ ملي كان عليه في الأيام الأخيرة من نضام بورقيبة. و الخطاب الجديد متاع هاك اليوم المزبل عطا نكهة جديدة و أمل جديد فالتغيير النموذجي للسلطة و الوعود الخادعة إلي قطعها على نفسو "زابا" ما كانت في الواقع كان رش رماد على العينين. و ما فاتت سنتين على التحول حتى تأكد لكل الناس إلي ستبشروا في وقت ما، أنو ما تغير شيء، و الإنتخابات أكدت هذا.
           وولات من وقتها أغلبية السجون متاع البلاد وسيلة إسكات و حتى قتل كل من يخرج على الصف، و البنادرية فالبلاد كثرة و بداو الكل يفتيو فالخطاب متع 7نوفنبر و ردوه كاينوا قرآن نزل من السماء و كل يوم يكتشفو فيه معالم و تفاسير جديدة مواكبة للعصر متاع التجمعيين و نافذة على عامة الشعب.....
و في بداية القرن 21 تفرضت الأنترنات فالبلاد بقدرة قادر و خذات صدى كبير عند جل العايلاة التونسية و ولات حتى إلي ماعندوش يتداين و يشري لولادو كمبيوتر باش يكونو مواكبين التقدم العلمي و هذا ما فتح نافذة على العالم الخارجي إلي عامة الشعب ماكان يسمع منوا كان إلي تتمزا بيه الحكومة من وراء الشاشة الصغيرة و الأنباء إلي في أغلب الأحيان مفبركة على قياس الحاكم.
        و بدات تظهر رجال جديدة فالبلاد، صحيح من وراء ستار الصفحات الإلكترونية و أسامي فالغالب مستعارة، هالوضع الجديد عطا فرصة لكل مواطن أنو يعبر على مواقفو من غير تحفظ لأنو كان يظنو أن الشبكة العنكبوتية ممكن تحمي هويتو الحقيقية و الإسم المستعار لا يمكن أن يدل على صاحبو، و عملو مدونات و عطاو أجنحة لتعبيرهم و خذاو غرضهم في التنكيل بالنضام و المساوء متاعو و الترافيك متاع أقاربوا و المقربين من التجمعيين و أعيان البلاد و البوليس السياسي طبعا، إلي هو زادة ماإدخرش جهد و سعى في أقرب الأوقات باش ينسج خيوط على الشبكة العنكبوتية و يعرف من كان وراء تلك الأسامي المستعارة و المدونات إلي ضربة النظام الفاسد.
          و من وقتها بدات عمليات الإعتقالات تحت جناح الضلام، و من وقتها عرفو المدونين الأحرار آلة الإرهاب إلي كانو يتصورو أنها موش ممكن توصللهم، و إكتشفوا بشاعة التعذيب و الإنتهاكات و الإغتصاب للأبناء كان أغلبهم لم يتجاوز بعد سن العشرين.
         ومات إلي مات و تحطمت حياة إلي قدر يعيش و يصمد لهاك التعذيب، و إلي تذكرت أسماؤهم من طرف المدونين الأحرار و الصحافيين النضاف لا يتجاوز عددهم فالحقيقة 10 بالمأة من العدد الحقيقي للي ماتو و تعذبو في أروقة وزارة التنكيل و لا فالحبوسات إلي تخصصت في إتلاف الإنسان و كل ما يربطه بالعالم الخارجي.
           و جا اليوم إلي تفوق فيه الحق على الباطل، و جات القطرة إلي فيضة الكاس، البوعزيزي إلي حرق نفسو، كان ممكن الخبر يمر كيف ما مرت الأخبار إلي سبقتو من الناس إلي حرقو نفسهم ولا حرقوهم و إعتبروهم مجرمين، اما حكاية البوعزيزي خطفوها الشباب متاع الفايسبوك و تويتر(إلي الناس كانت تتمنيك عليهم و يقولو عليهم شباب مايع)و قيمو بيها القيامة، و تناقلت بين الناس إلي حسوا فيهالمرة بالتعدي على الكرامة متاع التونسي، و الغدر بيه، و ببعد السلطة على المواطن و عدم إكتراثها بالأوجاع إلي كانت مأرقتلو نومو و مانعتو حتى من الحلم كيما عباد ربي الكل، و ما فاتت أيامات قليلة حتى لقى روحو "زابا" إلي ظن أنوا بنا صرح كبير يحميه من الشعب، وحدوا في مكتب مخيف، كل إلي حولو و كانو ينفخولو في صورتو هربو و خلاوه يخاف حتى من خيالو، ما لقا بيها وين، فصع (هرب).....
           و جات حكومة في جرة حكومة و ما زالت لبلاد تلوج على دستور جديد يمكن باش يضمنلها حقها و ما عادش حتى حاكم يضحك علينا بكلمتين و بعد ما يشد الحكم يقول "أنا أو لا أحد"
         عاشت تونس حرة مستقلة و عاش شعبها الأبي و الله يرحم كل من عطى قطرة من دموا فداء لها البلاد و لها الشعب .